الثلاثاء، 15 فبراير، 2011

منار

(المشهد الاول)


قاعة المحاضرات بمبنى طريق الحرية

( المنظر داخل القاعه يتكون من غرفة محاضرات عاديه تحتوى على المكان الخاص للاستاذ و المقاعد الخاصه للطلبه .. عدد الطلبه داخل القاعة يقرب على العشرين معظمهم من الفتيات و عدد الاولاد بالضبط سته .. يجلس الجميع فى ثلاث صفوف متتاليه و الطلبه جميعا جالسين فى الصف الاخير)

(لا يوجد مدرس بالقاعه فبالتالى يتعالى صوت الطلبه و الطالبات فى مزيج غير منسجم .. و لكن سوف يكون التركيز على صوت الفتيان حسب الحوار)

شهاب : (الحوار لجميع الاولاد حوله) شفتوا الشيخ رضا عمل فيا ايه امبارح؟؟؟ ... اديتله الموبيل شويه فى محاضره البكتريولوجى و سهيت عنه .. بعد ما خرجت من المحاضره خااااااااالص و روحت البيت بتصل بواحد صحبى لقيتهم قالولى انى ما عنديش رصيد

احمد : و انت ما لقتش الا الشيخ رضا تديله الموبيل ؟؟؟ ... يابنى ده واحد اختبرناه اكتر من مره و اثبت انه شيخ تايوانى .. تلاقيه ساب المحاضره بالى فيها و قعد يتكلم مع البت بتاعته

رضا : بت ايه ياله انت و هو .. ربنا يكفينا شرهم ..

علاء : ربنا يكفيك شرهم ليه يا عم الشيخ ؟؟؟ ... هما صحيح كلهم ولاد كلب و مخهم لاسع .. بس فى نفس الوقت ما تقدرش تسيبهم فى حالهم او هما يسيبوك فى حالك .. هو ربنا خلقنا كده ... بالرغم من وجع الدماغ اللى بيعملوه الا انك اول ما تشوف بنت حلوه كده حتلاقى نفسك غصبن عنك عنيك ثبتت عليها زى اللزقه ام غرا

رضا : ليه يعنى ؟؟؟ ... انت ما عندكش اراده؟؟؟ ما تقدرش تقاوم نفسك؟؟؟؟

علاء : ما ينفعش يا عم الشيخ ... ده لسبب بسيط اوى

حجاج : سبب ايه ؟؟؟؟

علاء : انك ولد و هى بنت ... انت عمرك عنيك حتثبت على ولد حتى لو كان احلى ولد فى الدنيا؟؟؟؟؟

احمد : شايف الكلام المفيد؟؟؟ ... الواد علاء جاب التايهه

شهاب : تايهه ايه الله يحرقك انت و هو ... انت وديت الرصيد فين يا عم الشيخ ؟؟؟؟ .... عارفين يا جماعه انا شاكك فى حاجه ..

احمد : شاكك فى ايه؟؟؟؟

شهاب : انا اتكلمت مع واحد صحبى النهارده و انا جاى قالى انى اتصلت بيه امبارح و قعد يقول الو الو الو اكتر من تلت ساعه من غير ما حد يرد

حجاج : يعنى ايه؟؟؟؟؟؟

شهاب : يعنى عم الشيخ قعد يلعب فى الموبيل فاتصل بواحد صاحبى و فتح السكه و ما قفلهاش فطار الرصيد

رضا : ااااااااااااااااااااااااااااااه ... و انا بقول الموبيل عمال يطلع اصوات غريبه ليه كل شويه ؟؟؟؟؟

حجاج : يا رااااااااااااااااااااااااااااااااجل ... (لشهاب) و الله انا لو منك اخد منه حق المكالمات دى كلها ... مش عشان حاجه ... عشان بس نظافه الدماغ الى عنده

شهاب : و الله هو الغلط مش عليه .. الغلط على الحمار اللى لما اتصل عم الشيخ بيه قعد يقول الو الو نص ساعه و ما قفلش السكه ... ده انا حروح النهارده اخرب بيته ... بعد ما اخرب بيت عم الشيخ طبعا

رضا : يا عم انت حتتكلم كتير ليه ؟؟؟؟ ... الفلوس الى انت عايزها حدهالك

شهاب : يا عم انت لاقى تاكل...

علاء : يا جماعه عيب الكلام ده .... فلوس ايه الى انت عايز تاخدها ... ده كفايه البركه الى الشيخ رضا عاملها .. و النبى يا عم الشيخ هات شويه بركه ( يمسح يديه بثياب رضا )

رضا : (يضحك) و انت فاكرنى يعنى كنت حديه فلوس بجد؟؟؟؟ .... الحساب يوم الحساب و يبقى يقابلنى يوم القيامه ساعتها ربنا يسهل

احمد : مش بقولكم شيخ تايوانى ... و لا انت ايه رايك يا رحومه؟؟؟؟؟؟

شهاب : سيب رحومه فى حاله الراجل مش فاضيلنا ... عمال يذاكر من الصبح ... عليه العوض و منه العوض فى الرصيد ... اقولك ايه بس يا رضا؟؟؟ ... ربنا ينتقم لى منك

رضا : تقبل الله منا و منكم

حجاج : دكتوره حنان وصلت

(يسود الصمت فجاه ... تدخل دكتوره حنان ... تضع بعض المراجع على المكتب ثم تنظر الى المكان الذى يجلس فيه الطلبه و تبتسم)

د حنان : ايه الهنا الى انا فيه ده .. انتوا كلكم جايين مع بعض النهارده؟؟؟ ... ده انتوا ما عملتوهاش من اول السنه

احمد : و الله يا دكتور ده بس عشان محاضره حضرتك

رحومه : يا دكتور و الله احنا بنحضر لحضرتك على طول عشان حضرتك بتقولى حاجات بنستفاد منها جامد و مش بنلاقيها فى اى حته تانيه

علاء : (فى اذن رحومه ) يا منافق

د حنان : خلاص يا جماعه بلاش كلام عشان نبدا المحاضره ... انتوا عارفين ان احنا متاخرين و كورس الهندسه الوراثيه ده لازم يخلص فى اقرب وقت ... زى ما قلتلكم المره الى فاتت كل مجموعه حتقوم تشرح الجزء الى انا قلت انها تحضره ... مين اول مجموعه معانا؟؟؟؟؟

صوت احدى الفتيات : مجموعه منار

د حنان : قومى يا منار و تعالى على البورد

( تقوم منار و تمشى ناحيه البورد ... يلاحظ ان منار فتاة انيقه جدا و على قدر عالى من الجمال و هو جزء سوف يدور حوله الحوار فيما بعد ... تقف امام البورد و تبدا فى الشرح ... تتكلم بصوت رقيق و لهجه مهزوزه قليلا و لكن تتكلم بلهجه واثقه تدل على معرفتها بما تتكلم عنه )

( يسود الصمت و يبدا الجميع فى الانصات .. تدور همهمات بين الاولاد و هى التى سوف يتم التركيز عليها كما فى المره السابقه )

رحومه : (هامسا لعلاء) البنت منار دى بنت استاذه ....

علاء : (هامسا) عندك حق و الله ... جميلة اوى

رحومه : (هامسا) انا مش بتكلم على كده يا بنى ادم يا سافل انت ... انا بتكلم على طريقتها فى الشرح ... شفت لسه قايله ايه دلوقتى؟؟؟؟

علاء : (هامسا) هى كانت بتقول ايه؟؟؟؟؟؟؟

( تستمر الهمهمات بين الاثنين و لكن ينخفض الصوت ... يتصاعد صوت الهمهمات بين شهاب و حجاج )

حجاج : (هامسا لشهاب) شايف البنات الى بتذاكر .... ده احنا رايحين فى داهيه خالص

شهاب : (هامسا) تبقى تفكرنى اخد منها التلخيص بعد المحاضره ما تخلص ...

حجاج : (هامسا) طب ما تاخدها من علاء ... على فكره هو بيعمل محاضرات كويسه

شهاب : (هامسا) يا عم علاء ايه و زفت ايه ... ده انتوا الى يمشى وراكم يروح فى داهيه

( يخفت صوت الحوار بينهم و يتصاعد صوت الهمهمات بين احمد و رضا )

احمد : (هامسا لرضا) ايه رايك بقى يا عم الشيخ فى القمر الى واقف بيشرح ده؟؟؟؟

رضا : (هامسا) يا عم حد الله بينى و بينها

احمد : (هامسا) و الله انت فقرى ... يعنى البنت دى لو قالتلك فى يوم انا جايه معاك اوصلك للمدينه الجامعيه مش حتوافق؟؟؟؟

رضا : (هامسا) و الله اوافق ... طالما حتدفع اجره التاكسى

احمد : (هامسا) مش بقولك انت شيخ تايوانى .....

د حنان : (بصوت عالى) بس شويه يا منار ... فى ايه يا جماعه ورا؟؟؟؟.. انتوا بتتكلموا فى ايه؟؟؟؟

شهاب : اصل احنا شايفينها واقفه مكسوفه ... فلو ولد كان طلع الاول يعنى كان يبقى احسن

د حنان : (تتصاعد حده صوتها) يعنى ايه مكسوفه يعنى؟؟؟؟؟

شهاب : انا اقصد يعنى يا دكتور ....

د حنان : (تقاطعه و تتصاعد حده صوتها لدرجه كبيره) يعنى ايه يعنى مكسوفه؟؟؟ انت يعنى لو كنت طلعت كنت حتبقى مش مكسوف؟؟؟؟ ... على الاقل هى عارفه هى بتقول ايه.. الدور و الباقى عليكوا انتوا

شهاب : انا كنت بقول ....

د حنان : انت ما تقولش حاجه خالص ... و لو سمعت اى صوت منكم تانى حطردكم بره المحاضره ... مفهوم

رحومه : مفهوم يا دكتور ... احنا اسفين جدا

( يسود الصمت حتى ينتهى دور منار و تنتهى المحاضره معها .. تخرج د حنان و يتصاعد الصوت بين الجميع ثانيه)

علاء : (يفرد ذراعيه عن اخرهما و يتثاءب) يا خبر ابيض .. ده لسه محاضره تلات ساعات تكنولوجيا حيويه ... ده احنا حيتخرب بيتنا النهارده ...

احمد : (لشهاب) انت عبيط ياله انت ... فى حد يتكلم و يقول كده؟؟؟؟

علاء : اهبل ... مالوش فى السياسه

شهاب : انا لقيت البنت واقفه مكسوفه و حالتها منيله بنيله .. قلت احنا نطلع الاول ... ايه ... كفرت؟؟؟؟

احمد : يابنى يا حبيبى انت مش عارف ان الاتنين ستات زى بعض و ليهم نفس ال.... (يشير بيده بطريقه متعرجه فى الهواء)

حجاج : بس عارفين يا جماعه ايه احسن حاجه عجبتنى؟؟؟ ... شهاب كانت الدكتوره نازله زعيق فيه و هو لسه محتفظ بابتسامته

رضا : اه و الله ... انا كنت حاسس انها خلاص حتتشل .. ده انت يا شهاب تشل بلد

شهاب : انت بالذات تخرس خالص يا عم الشيخ .. بدل ما تبقى سنتك سوده

حجاج : (لشهاب) الحق صاحبك رحومه حيخطف منك المحاضره

( يشير الى رحومه الذى يقف و يتكلم مع منار )

شهاب : يابن الذين يا ميه من تحت تبن

( يجرى بسرعه الى رحومه و منار )


(المشهد الثانى)


( منظر لكليه علوم الشاطبى .... تظهر الحركه المختلفه للطلبه فى كل مكان و نجد عصام الشهاوى جالسا فى مكان بقرب مدرج ثلاثة )

عصام : (لنفسه) كل ده كان ليه لما شفت عنيه .... انا اعمل ايه فى نفسى بس ... مش عارف ... هو الموضوع كله كلمه ... حتى الكلمه دى مش جايه خالص ... الله يخرب بيتك يا ام فاروق على بيت اليوم الى شفتك فيه

( كريم شلبى يمر على الموقع الذى يجلس فيه عصام و يقف لحظه يتامله مبتسما )

( عصام لا يبدو انه منتبها و يستمر فى سرحانه )

كريم : عارف يا عصام انت منظرك مش منظر طالب خالص ... انت تنفع تبقى شحات محترم اوى من شحاتين السيده

عصام : (منتبها) ايه ده ... ازيك يا كريم

كريم : يا راجل ... انت لسه شايفنى دلوقتى ؟؟؟؟؟

عصام : يا عم شايفك من الصبح ... بس يعنى اعملك ايه ؟؟؟؟ .... لازم اقوم اضربلك تعظيم سلام ... هو انت رئيس الجمهوريه؟؟؟؟

كريم : قاعد لوحدك ليه كده

عصام : اه .... ورايا محاضره كمان ساعه و مش عارف اعمل ايه دلوقتى .... بقولك ايه ياله يا كريم .... ما تعزمنى على سندوتش فول

كريم : حتعيش شحات و تموت شحات ... الا عمرى ما شفتك حتى بتعزم حد على واحده تشكلتس

عصام : و انا برضه ربنا رازقنى على طول بصحاب عره

( تمر فتاه من امامهم بسرعه ... تلقى السلام على كريم و عصام ثم تتابع طريقها )

عصام : مش دى البت شاهنده ؟؟؟؟؟؟

كريم : اه .... انت اول مره تشوفها ؟؟؟؟

عصام : (يتابعها ببصره) هى مال ضهرها بقى حلو اوى كده؟؟؟؟؟؟

كريم : (يتغير قليلا) ما تلم نفسك يابا شويه ... انت على طول وسخ كده؟؟؟؟

عصام : ما هى ضهرها حلو فعلا يا كريم ... غلطان انا ؟؟؟؟ ده حتى الساكت عن الحق شيطان اخرس

كريم : و هو الى انت بتقوله ده بقى يبقى الحق عندك ... يابنى عيب تتكلم فى الحاجات دى على زميلة محترمه ليك

عصام : يا كريم محترمه و لا مش محترمه .... كلهم فى السرير بيبقوا واحد

كريم : ده انت زباله .... انا ماشى

عصام : مش حتعزمنى على الفول؟؟؟؟؟

كريم : لما انت تتنازل الاول و تعزمنى على مستيكايه بشلم ... و انا واثق انك مش حتعمل كده ... سلام (ينصرف)

عصام : (يعود لنفسه) حتى سندوتش الفول مش عارفين نتحصل عليه ... ده ايه اليوم المهبب ده .....

( يستمر فى سرحانه قليلا .... و فجاه يرفع عينيه فيجد علاء واقفا امامه )

علاء : ازيك يابن الشهاوى .... بقالى الف سنه ما شفتكش

عصام : يا بنى يا حبيبى انت على طول بتيجى فجاه كده ؟؟؟؟ ... ازيك يا علاء عامل ايه؟؟؟

علاء : الحمد لله .... خير ... (مبتسما) ده انت شكل ام فاروق عامله معاك عمايلها

عصام : اه و الله يا علاء .... الواحد محتاس و مش عارف يعمل ايه

علاء : و انت طبعا مشتاق و عندك لوعه ... و الله شكلك باين عليه ... شبه شحاتين السيده

عصام : انت حتعمل زى كريم شلبى و لا ايه

علاء : هو كان هنا ؟؟؟؟؟

عصام : اه كان هنا ... و ما رضاش يجيبلى سندوتش فول المعفن و زعل لما قلت على شاهنده ان ضهرها حلو

( ينفجر علاء ضاحكا )

علاء : و ليه كده؟؟؟؟

عصام : اصل انت مش عارف .... الواد كريم بيحب شاهنده

علاء : و هى دى حاجه جديده ؟؟؟؟ ... ماهى الكليه كلها بتحبها

عصام : الا انا عمرى ما شفتك فى يوم بتقول انا بحب البت دى و متشحتف زينا كده ... ليه كده يابنى يا حبيبى ؟؟؟؟

علاء : لا عادى يا عصام .... انا زيى زيكم تمام .... بس الفرق ان انا مافيش بنت ابدا حتقدر تستحملنى

عصام : ليه؟؟؟

علاء : (مبتسما) عشان انا مجنون ....

عصام : انت على طول كده ... عامل زى البحر الواحد ما يعرفلكش اول من اخر

علاء : امال فين على محى؟؟؟؟ هو ما جاش ؟؟؟؟

عصام : انت ما تعرفش .... مش على اتعارك مع البنت مروه و هما الاتنين دلوقتى عند الامن

علاء : و انت قاعد ساكت و فرحان ... سايبه لوحده ليه هناك ...

عصام : مانا كنت ناوى اروحله دلوقتى

علاء : طب قوم نروح نشوف فيه ايه

( يمشى الاثنان ناحيه مكتب امن الكليه )

( عند مكتب الامن نجد على محى واقف وحيدا مستندا على سياره .. و نجد مروه واقفه مع شاب اخر فى الناحيه المقابله ... نلاحظ ان ملابس على محى متسخه تماما )

علاء : (لعلى) فيه ايه يابنى ... ايه الى حصل ... انت ايه الى بهدلك كده ....

على : ايه ده ... انت هنا من امتى ؟؟؟؟

علاء : ايه الى حصل؟؟؟؟

على : مش اتعاركت مع مروه ...

علاء : ماهو واضح .... و اتعاركت معاها ليه ؟؟؟؟؟

على : و الله مش عارف الموضوع جه ازاى ... انا خلصت المحاضره النهارده و طلعت لقيتها بعتالى الحاجات الى انا كنت مديهالها هديه مع الواد ده و هو جه قالى مروه بتقولك ان الموضوع بينا كده انتهى خالص

علاء : و بت الكلب دى ما كانتش تقدر تقولك كده بنفسها ... و الاخ ده ايه الى دخله فى الموضوع ؟؟؟

على : ماهو ده الى غاظنى ... انا لقيته جايلى بالحاجات و هى واقفه من بعيد تتفرج ... فخدت الحاجات منه و رحت عندها اكلمها و قلتلها الى انت لسه قايله ده دلوقتى ... المهم الموضوع كبر و لقيته بيقولى تبقى تكلمها بطريقه احسن من كده قلتله انت مالكش فى الموضوع اصلا ... و عينك ما تشوف الا النور

علاء : ايه الى حصل ؟؟؟؟

على : و الله يا علاء مش عارف بالظبط ... انا لقيت نفسى على الارض و الاخ ده فوقيا و الكليه كلها ملمومه علينا ... حتى اسال عصام

علاء : هو عصام كان واقف ساعتها ... (لعصام) و انت يابنى شايفه بيمسحوا بيه بلاط الكليه و ساكت ؟؟؟؟

عصام : لا انا دخلت اخلص ما بينهم ... بس بينى و بينك كنت واقف اخلص و اضحك فى نفس الوقت ... اصل على كان شكله مسخره

على : بس انا ما سيبتهوش يضربنى ... انا اديته ايد جامده على دماغه ... بس الحقيقه هى دى الضربه الوحيده الى ضربتهاله

علاء : (مبتسما) لا فالح .... و الظابط عمل معاكوا ايه ؟؟؟؟؟

على : و الله هو الظابط خدنى على جنب و قالى احسن انك تلم الموضوع ده و ما تعملش محضر و لا حاجه ... دى برضه بنت و ممكن تتبلى عليك و تقول انك مسكتها مش عارف منين و تروح انت فى داهيه ....

علاء : لا ده هو الى عايز يلم الموضوع بس ... اصل انت مش عارف لو اتعمل محضر بالضرب و طلع بره حتبقى فى وشه هو ... مش هو الى ماسك الامن فى الكليه؟؟؟؟

على : انا اصلى قلت بلاش اعمل مشاكل ... ده حتى معورنى فى ايدى اه (يرى علاء جرح فى يده)

علاء : (مغتاظا) يابنى يا حبيبى انت كده ما خدتش حقك (رافعا صوته قليلا حتى يسمعه كل من مروه و الفتى الذى امامها) عارف انا لو منك اروح القسم دلوقتى و اعمل محضر بالموضوع ده و اوريهم الجرح الى فى ايدى ده ... و انت عندك شهود كتير ... الكليه كلها شافتك ... على النعمه بموضوع زى ده حيخدوهم هما الاتنين القسم و يعملوا معاهم احلى واجب

( تنظر مروه الى علاء نظره غريبه و يطرق الفتى بوجهه الى الارض)

عصام : شفت البت مروه بتبصلك ازاى

علاء : (مبتسما) اصل بينى و بينها عمار .... و لا هى بتطيقنى و لا انا بطيقها ... و خصوصا بعد موضوع كده حصل امبارح ... اصلى ماسك عليها زله دلوقتى ...

على : (باهتمام) ليه ايه الى حصل؟؟؟؟

علاء : حاجة حصلت بقى و خلاص .... على عموم انت واقف هنا دلوقتى بتعمل ايه؟؟؟ ... مش الموضوع خلص خلاص...

على : لا خلاص .... ده انا كنت لسه دلوقتى ناوى اروح قبل ما انتوا تيجوا

علاء : اوكيه ... يلا بينا .... و افتكر يا على انى قلتلك ان البنت دى بنت كلب من اول يوم شفتها فيه ... انت الى مصدقتش كلامى

عصام : معلش بقى يا علاء ... مرايه الحب عميه

علاء : (ضاحكا) لا و صاحبك على ما عندوش المرايه اصلا .... لسه متكلم عليها

على : مش تقولى بقى ايه الى حصل امبارح؟؟؟؟؟؟

علاء : لا مش حقولك يا على ... الموضوع خلص .... تعالى بس نطلع نتمشى شويه على البحر .... يلا يابن الشهاوى

عصام : بس انا دلوقتى عندى محاضره

علاء : و انت من امتى بتحضر محاضرات ؟؟؟؟ ... الى يشوف كده يقول الواد ناوى يذاكر و ينجح ...

عصام : على رايك ... بلا نيله ... بس مافيش حد ناوى يعزمنى على فول قبل ما نمشى .. انا جعان

علاء : يا عم اتنيل و امشى ... ده انت فضيحه

( ينصرف الثلاثه)

- ستار -

ليست هناك تعليقات:

إرسال تعليق